佛系

乜野係佛系?就係連你信果位大神都話你天生佛系就真係佛系。

話說前幾年開始每到新年都有求籤,其實冇乜特別目的,只係睇下當年應該用咩心態做野、有冇野要小心之類,以及問一兩個自己在意的問題。只要問得清楚大神都答得好清楚。邪釘在於同一問題無論問幾多次,佢都會畀同一個答案你。為了更靈驗,基本上求左就要信同執行,這是我個人約束。
有個問題我年年問,話說當年我剛離開出版社,個心仍然向住呢個行業,亦都好想畫原創漫畫,於是我問咗三個問題:
1. 我的創作路會如何?
2. 廢青本賣唔賣得?
3. 轉工好唔好?
第一題大神派咗支38籤陶淵明辭官畀我,睇過陶生首詩就知佢心諗:「超!做官有乜咁把閉~窮都好過對住朝廷班友」於是返鄉下耕田,得閒同班朋友吟詩作對吹下水,樂得清靜。對應我嘅心態就係:「超!熱門坑/香港漫畫圈有乜咁把閉,窮都好過對住班友。」於是自摺(。)理性上我認為唔世故真係唔係咁好,但性格行徑出到嚟係咁我都冇計,我就係一個懶理他人,一丁友都自得其樂嘅摺友。而我下一年再求都係同一結果。
以至於我咁嘅性格出原創本,結果就係72籤高文定守困,即是守株待兔的故事。用同人嘅舊做法套落原創度,畫完就算9數,推書冇力水,SNS零交流,都係失敗嘅原因之一。以前做得到係因為有人幫,得我一個根本唔成事。而我當日其實唔明支籤想講乜,到今日再平心靜氣睇返先知,人哋神早講左唔多掂,係你自己習氣太重唔想明。
至於轉工問題就更邪門,連續三年40籤伯才碎琴,大意係「係得呢間公司包容到你、用得著你。你去第二度無用武之地仲sad過家陣㗎on9仔。」於是我走嚟走去都走唔到,變成公司嘅淤泥(。
不過到最後大神都有安慰我,派咗一支籤叫我努力振作修為,全力做好手頭的事,有發圍㗎。(希望唔係條腰啦吓。)
年尾睇返年頭,不過不失啦。講出嚟等我可以梳理返前幾年嘅心情、放底佢,然後重新嚟過。
(係呀,我有咩挫折都要幾年時間先起得返身,我都懷疑自己瞓喺地自憐嘅時間多過做實事,我會試下縮返短少少,事關我都唔知自己有冇咁長命沮喪。)

發佈留言

發佈留言必須填寫的電子郵件地址不會公開。 必填欄位標示為 *